२०२५ को पहिलो उल्का वर्षा आज राति

१९ पुष, काठमाडाैं।

सन् २०२५ को पहिलो उल्का वर्ष शुक्रबार राति हुने भएको छ । यस उल्का वर्षालाई भूतप नाम दिइएको नेपाल एस्ट्रोनोमिकल सोसाइटी (नासो) ले जनाएको छ ।

बुटिज (भूतप) नामक तारामण्डलबाट उक्त उल्कावर्षा हुने भएकाले यसलाई सो नाम दिइएको हो । १३ पुषदेखि २८ गतेसम्म अत्यधिक वर्षा हुने भए पनि आज राति भने सबैभन्दा बढी हुने बताइएको छ ।

कम प्रदूषण तथा खुला आकाश भए नाङ्गो आँखाले स्पष्ट देख्न सकिने नासोले जारी गरेको विज्ञप्तीमा उल्लेख छ । पृथ्वीले सूर्यको परिक्रमा गर्ने क्रममा अन्तरिक्षमा रहेका धुलाका कणहरु र चट्टानहरु पृथ्वीको वायूमण्डलमा तीव्र गतिले ठोक्किएर जल्दा उल्काको वर्षा भएझैँ देखिन्छ ।

यो उल्कावर्षा हेर्न कुनै उपकरण आवश्यक नपर्ने र प्रतिघन्टा ५० देखि १२० वटासम्म उल्का देख्न सकिने नासोले जनाएको छ । यी मध्यम गतिका उल्का ७० किलोमिटर माथिसम्मको वायूमण्डलमा देखिनेछन् ।